O’zbek tilidagi rasmiy Yordam forumlari

Bugundan e’tiboran uz.wordpress.org sayti doirasida o’zbek tilidagi rasmiy WordPress Yordam forumlari ish boshladi. Forum bo’limlari yaratildi va to’liq muhokamalarga tayyor holatga keltirildi. Endi istagan foydalanuvchi tizim haqidagi o’zini qiziqtirgan savollarni berishi, boshqa foydalanuvchilarga javob yozish orqali yordam ko’rsatishi, qizg’in muhokamalarda qatnashishi mumkin.

Yordam forumlariga asosiy menyudagi Yordam bandi orqali o’tishingiz mumkin. https://uz.wordpress.org/support manzili bundan keyin WordPress tizimining o’zbek tilidagi rasmiy Yordam forumlari manzili hisoblanadi.

Forumda ishtirok etish istagida bo’lgan har qanday foydalanuvchi birinchi navbatda wordpress.org tizimiga a’zo bo’lishi shart.

Ayni paytda Yordam forumlari saytini o’zbek tiliga o’girish ustida qizg’in ish olib borilmoqda. Tarjimalar nihoyasiga yetgach forumlarning alohida bo’limlari uchun mo’ljallangan va umumiy amal qiladigan qoidalarni ishlab chiqishni rejalashtirganmiz.

Forumlarda faol ishtirok eting!

WordPress tizimi endi 100% o’zbek tilida!

Sevimli tizimimiz endi to’liq o’zbek tilida! Joriy vaqt uchun eng so’nggi hisoblangan WordPress 4.7 versiyasi to’liq o’zbek tiliga o’girildi. Bundan keyin WordPressning eng so’nggi versiyalarida o’rnatilishdan oldin tanlanadigan tillar orasida o’zbek tilini ko’rishingiz mumkin bo’ladi.

Tarjimadagi barcha rus tili aralashgan tarjimalar tozalandi va to’laligicha o’zbek tiliga o’girildi. Ayni vaqtda ba’zi imloviy xatolarning tuzatilishi ustida faol ish olib borilmoqda. Bir necha oy davomida tarjimalar to’liq o’zgarmas holatga keltirilishini rejalashtirganmiz.

Saytingiz avvaldan ishlab turgan bo’lsa, Sozlanmalar → Umumiy bandiga kirib saytingiz tilini o’zbek tiliga o’zgartirishingiz mumkin. Tarjimalar hozirgi kunda ham faol qayta ishlanish jarayonida bo’lganligi sababli tez-tez yangi tarjimalar yangilanishi haqida xabarlar olib turishingiz mumkin. Imkon boricha har bir yangilanishni yuklashingizni tavsiya etamiz.